เภทานุวตฺตกานํ ตุ, ถุลฺลจฺจยมุทีริตํ;
คณโภเค ตุ ภิกฺขูนํ, ปาจิตฺติ ปริทีปิตาฯ
[322]
ขนฺธเก วตฺตสํยุตฺเต, กติ อาปตฺติโย มตา?
ขนฺธเก วตฺตสํยุตฺเต, ทุกฺกฏาปตฺติเยว สาฯ
[323]
ฐปเน ปาติโมกฺขสฺส, ตถา เอกาว ทีปิตา;
ภิกฺขุนิกฺขนฺธเก จาปิ, กติ อาปตฺติโย มตา?
[324]
ภิกฺขุนิกฺขนฺธเก จาปิ, ทฺเว ปนาปตฺติโย มตา;
อปวารณาย ปาจิตฺติ, เสเสสุ ปน ทุกฺกฏํฯ
ขนฺธกปุจฺฉากถา นิฏฺฐิตาฯ
สมุฏฺฐานสีสกถา
[325]
วิภงฺเคสุ ปน ทฺวีสุ, ปญฺญตฺตานิ มเหสินา;
ยานิ ปาราชิกาทีนิ, อุทฺทิสนฺติ อุโปสเถฯ
[326]
เตสํ ทานิ ปวกฺขามิ, สมุฏฺฐานมิโต ปรํ;
ปาฏวตฺถาย ภิกฺขูนํ, ตํ สุณาถ สมาหิตาฯ
[327]
กาโย จ วาจาปิ จ กายวาจา;
ตาเนว จิตฺเตน ยุตานิ ตีณิ;
เอกงฺคิกํ ทฺวงฺคิติวงฺคิกนฺติ;
ฉธา สมุฏฺฐานวิธิํ วทนฺติฯ
[328]
เตสุ เอเกน วา ทฺวีหิ, ตีหิ วาถ จตูหิ วา;
ฉหิ วาปตฺติโย นานา-สมุฏฺฐาเนหิ ชายเรฯ
[329]
ตตฺถ ปญฺจสมุฏฺฐานา, กา จาปตฺติ น วิชฺชติ;
โหติ เอกสมุฏฺฐานา, ปจฺฉิเมเหว ตีหิปิฯ
[330]
ตเถว ทฺวิสมุฏฺฐานา, กายโต กายจิตฺตโต;
วาจโต วาจจิตฺตมฺหา, ตติยจฺฉฏฺฐโตปิ จฯ
[331]
จตุตฺถจฺฉฏฺฐโต เจว, ปญฺจมจฺฉฏฺฐโตปิ จ;
ชายเต ปญฺจธาเวสา, สมุฏฺฐาติ น อญฺญโตฯ
[332]
ติสมุฏฺฐานิกา นาม, ปฐเมหิ จ ตีหิปิ;
ปจฺฉิเมหิ จ ตีเหว, สมุฏฺฐาติ น อญฺญโตฯ
[333]
ปฐมา ตติยา เจว, จตุตฺถจฺฉฏฺฐโตปิ จ;
ทุติยา ตติยา เจว, ปญฺจมจฺฉฏฺฐโตปิ จฯ
[334]
ทฺวิธา จตุสมุฏฺฐานา, ชายเต น ปนญฺญโต;
เอกธา ฉสมุฏฺฐานา, สมุฏฺฐาติ ฉเหว หิฯ
อาห จ –
[335]
‘‘ติธา เอกสมุฏฺฐานา, ปญฺจธา ทฺวิสมุฏฺฐิตา;
ทฺวิธา ติจตุโร ฐานา, เอกธา ฉสมุฏฺฐิตา’’ฯ
[336]
เตรเสว จ นามานิ, สมุฏฺฐานวิเสสโต;
ลภนฺตาปตฺติโย สพฺพา, ตานิ วกฺขามิโต ปรํฯ
[337]
ปฐมนฺติมวตฺถุญฺจ, ทุติยํ สญฺจริตฺตกํ;
สมนุภาสนญฺเจว, กถิเนฬกโลมกํฯ
[338]
ปทโสธมฺมมทฺธานํ, เถยฺยสตฺถญฺจ เทสนา;
ภูตาโรจนกญฺเจว, โจริวุฏฺฐาปนมฺปิ จฯ
[339]
อนนุญฺญาตกญฺจาติ, สีสาเนตานิ เตรส;
เตรเสเต สมุฏฺฐาน-นยา วิญฺญูหิ จินฺติตาฯ
[340]
ตตฺถ ยา ตุ จตุตฺเถน, สมุฏฺฐาเนน ชายเต;
อาทิปาราชิกุฏฺฐานา, อยนฺติ ปริทีปิตาฯ
[341]
สจิตฺตเกหิ ตีเหว, สมุฏฺฐาเนหิ ยา ปน;
ชายเต สา ปนุทฺทิฏฺฐา, อทินฺนาทานปุพฺพกาฯ
[342]
สมุฏฺฐาเนหิ ยาปตฺติ, ชาตุจฺฉหิปิ ชายเต;
สญฺจริตฺตสมุฏฺฐานา, นามาติ ปริทีปิตาฯ
[343]
ฉฏฺเฐเนว สมุฏฺฐาติ, สมุฏฺฐาเนน ยา ปน;
สมุฏฺฐานวเสนายํ, วุตฺตา สมนุภาสนาฯ
[344]
ตติยจฺฉฏฺฐโตเยว, สมุฏฺฐาติ หิ ยา ปน;
สมุฏฺฐานวเสนายํ, กถินุปปทา มตาฯ
[345]
ชายเต ยา ปนาปตฺติ, กายโต กายจิตฺตโต;
อยเมฬกโลมาทิ-สมุฏฺฐานาติ ทีปิตาฯ
[346]
ชายเต ยา ปนาปตฺติ, วาจโต วาจจิตฺตโต;
อยํ ตุ ปทโสธมฺม-สมุฏฺฐานาติ วุจฺจติฯ
[347]
กายโต กายวาจมฺหา, จตุตฺถจฺฉฏฺฐโตปิ จ;
ชายเต สา ปนทฺธาน-สมุฏฺฐานาติ สูจิตาฯ
[348]
จตุตฺถจฺฉฏฺฐโตเยว, สมุฏฺฐาติ หิ ยา ปน;
เถยฺยสตฺถสมุฏฺฐานา, อยนฺติ ปริทีปิตาฯ
[349]
ปญฺจเมเนว ยา เจตฺถ, สมุฏฺฐาเนน ชายเต;
สมุฏฺฐานวเสนายํ, ธมฺมเทสนสญฺญิตาฯ
[350]
อจิตฺตเกหิ ตีเหว, สมุฏฺฐาเนหิ ยา สิยา;
สมุฏฺฐานวเสนายํ, ภูตาโรจนปุพฺพกาฯ
[351]
ปญฺจมจฺฉฏฺฐโตเยว, ยา สมุฏฺฐานโต สิยา;
อยํ ตุ ปฐิตา โจริ-วุฏฺฐาปนสมุฏฺฐิตาฯ
[352]
ทุติยา ตติยมฺหา จ, ปญฺจมจฺฉฏฺฐโตปิ ยา;
ชายเต อนนุญฺญาต-สมุฏฺฐานา อยํ สิยาฯ
[353]
ปฐมํ ทุติยํ ตตฺถ, จตุตฺถํ นวมมฺปิ จ;
ทสมํ ทฺวาทสมญฺจาติ, สมุฏฺฐานํ สจิตฺตกํฯ
[354]
เอเกกสฺมิํ สมุฏฺฐาเน, สทิสา อิธ ทิสฺสเร;
สุกฺกญฺจ กายสํสคฺโค, ปฐมานิยโตปิ จฯ
[355]
ปุพฺพุปปริปาโก จ, รโห ภิกฺขุนิยา สห;
สโภชเน, รโห ทฺเว จ, องฺคุลี, อุทเก หสํฯ
[356]
ปหาเร, อุคฺคิเร เจว, เตปญฺญาสา จ เสขิยา;
อธกฺขกุพฺภชาณุญฺจ, คามนฺตรมวสฺสุตาฯ
[357]
ตลมฏฺฐุทสุทฺธิ จ, วสฺสํวุฏฺฐา ตเถว จ;
โอวาทาย น คจฺฉนฺตี, นานุพนฺเธ ปวตฺตินิํฯ
[358]
ปญฺจสตฺตติ นิทฺทิฏฺฐา, กายจิตฺตสมุฏฺฐิตา;
อิเม เอกสมุฏฺฐานา, เมถุเนน สมา มตาฯ
ปฐมปาราชิกสมุฏฺฐานํฯ
[359]
วิคฺคหํ, อุตฺตริญฺเจว, ทุฏฺฐุลฺลํ, อตฺตกามตา;
ทุฏฺฐโทสา ทุเว เจว, ทุติยานิยโตปิ จฯ
[360]
อจฺฉินฺทนญฺจ ปริณาโม, มุสา, โอมสเปสุณา;
ทุฏฺฐุลฺลาโรจนญฺเจว, ปถวีขณนมฺปิ จฯ
[361]
ภูตคามญฺญวาโท จ, อุชฺฌาปนกเมว จ;
นิกฺกฑฺโฒ, สิญฺจนญฺเจว, ตถา อามิสเหตุ จฯ
[362]
ภุตฺตาวิํ, เอหนาทริํ, ภิํสาปนกเมว จ;
อปนิเธยฺย, สญฺจิจฺจ, ปาณํ, สปฺปาณกมฺปิ จฯ
[363]
อุกฺโกฏนํ =00 ตถา อูโน, สํวาโส, นาสเนน จ;
สหธมฺมิกํ, วิเลขาย, โมหนามูลเกน จฯ
[364]
กุกฺกุจฺจํ, ขียนํ ทตฺวา, ปริณาเมยฺย ปุคฺคเล;
กิํ เต, อกาลํ, อจฺฉินฺเท, ทุคฺคหา, นิรเยน วาฯ
[365]
คณสฺส จ วิภงฺคญฺจ, ทุพฺพลาสา ตเถว จ;
ธมฺมิกํ กถินุทฺธารํ, สญฺจิจฺจาผาสุเมว จฯ
[366]
สยํ อุปสฺสยํ ทตฺวา, อกฺโกเสยฺย จ จณฺฑิกา;
กุลมจฺฉรินี อสฺส, คพฺภินิํ วุฏฺฐเปยฺย จฯ
[367]
ปายนฺติํ, ทฺเว จ วสฺสานิ, สงฺเฆนาสมฺมตมฺปิ จ;
ติสฺโส คิหิคตา วุตฺตา, ติสฺโสเยว กุมาริกาฯ
[368]
อูนทฺวาทสวสฺสา ทฺเว, ตถาลํ ตาว เตติ จ;
โสกาวสฺสา ตถา ปาริ-วาสิกจฺฉนฺททานโตฯ
[369]
อนุวสฺสํ ทุเว จาติ, สิกฺขา เอกูนสตฺตติ;
อทินฺนาทานตุลฺยตฺตา, ติสมุฏฺฐานิกา กตาฯ
ทุติยปาราชิกสมุฏฺฐานํฯ
[370]
สญฺจริกุฏิมหลฺลกํ, โธวาปนญฺจ ปฏิคฺคโห;
จีวรสฺส จ วิญฺญตฺติ, คหณญฺจ ตทุตฺตริํฯ
[371]
อุปกฺขฏทฺวยญฺเจว, ตถา ทูเตน จีวรํ;
โกสิยํ, สุทฺธกาฬานํ, ทฺเวภาคาทานเมว จฯ
[372]
ฉพฺพสฺสานิ, ปุราณสฺส, โลมโธวาปนมฺปิ จ;
รูปิยสฺส ปฏิคฺคาโห, อุโภ นานปฺปการกาฯ
[373]
อูนพนฺธนปตฺโต จ, วสฺสสาฏิกสุตฺตกํ;
วิกปฺปาปชฺชนํ, ยาว, ทฺวาร, ทานญฺจ สิพฺพนํฯ
[374]
ปูเวหิ, ปจฺจโย โชติํ, รตนํ, สูจิ, มญฺจกํ;
ตูลํ, นิสีทนํ, กณฺฑุ, วสฺสิกา, สุคตสฺส จฯ
[375]
อญฺญวิญฺญตฺติสิกฺขา จ, อญฺญเจตาปนมฺปิ จ;
สงฺฆิเกน ทุเว วุตฺตา, ทฺเว มหาชนิเกน จฯ
[376]
ตถา =01 ปุคฺคลิเกเนกํ, ครุปาวุรณํ ลหุํ;
ทฺเว วิฆาโสทสาฏี จ, ตถา สมณจีวรํฯ
[377]
อิติ เอกูนปณฺณาส, ธมฺมา ทุกฺขนฺตทสฺสินา;
ฉสมุฏฺฐานิกา เอเต, สญฺจริตฺตสมา กตาฯ
สญฺจริตฺตสมุฏฺฐานํฯ
[378]
สงฺฆเภโท จ เภทานุ-วตฺตทุพฺพจทูสกา;
ทุฏฺฐุลฺลจฺฉาทนํ, ทิฏฺฐิ, ฉนฺท, อุชฺชคฺฆิกา ทุเวฯ
[379]
อปฺปสทฺทา ทุเว วุตฺตา, ตถา น พฺยาหเรติ จ;
ฉมา, นีจาสเน, ฐานํ, ปจฺฉโต, อุปฺปเถน จฯ
[380]
วชฺชจฺฉาทานุวตฺตา จ, คหณํ, โอสาเรยฺย จ;
ปจฺจกฺขามีติ สิกฺขา จ, ตถา กิสฺมิญฺจิเทว จฯ
[381]
สํสฏฺฐา ทฺเว, วธิตฺวา จ, วิสิพฺเพตฺวา จ ทุกฺขิตํ;
ปุนเทว จ สํสฏฺฐา, เนว วูปสเมยฺย จฯ
[382]
ชานํ สภิกฺขุการามํ, ตเถว น ปวารเย;
ตถา อนฺวทฺธมาสญฺจ, สหชีวินิโย ทุเวฯ
[383]
สเจ เม จีวรํ อยฺเย, อนุพนฺธิสฺสสีติ จ;
สตฺตติํส อิเม ธมฺมา, สมฺพุทฺเธน ปกาสิตาฯ
[384]
สพฺเพ เอเต สมุฏฺฐานา, กายวาจาทิโต สิยุํ;
สมาสมสเมเนว, กตา สมนุภาสนาฯ
สมนุภาสนสมุฏฺฐานํฯ
[385]
กถินานิ จ ตีณาทิ, ปตฺโต, เภสชฺชเมว จ;
อจฺเจกมฺปิ จ สาสงฺกํ, ปกฺกมนฺตทฺวยมฺปิ จฯ
[386]
ตถา อุปสฺสยํ คนฺตฺวา, โภชนญฺจ ปรมฺปรํ;
อนติริตฺตํ สภตฺโต, วิกปฺเปตฺวา ตเถว จฯ
[387]
รญฺโญ, วิกาเล, โวสาสา-รญฺญกุสฺสยวาทิกา;
ปตฺตสนฺนิจยญฺเจว, ปุเร, ปจฺฉา, วิกาลเกฯ
[388]
ปญฺจาหิกํ =02, สงฺกมนิํ, ตถา อาวสถทฺวยํ;
ปสาเข, อาสเน จาติ, เอกูนติํสิเม ปนฯ
[389]
ทฺวิสมุฏฺฐานิกา ธมฺมา, นิทฺทิฏฺฐา กายวาจโต;
กายวาจาทิโต เจว, สพฺเพ กถินสมฺภวาฯ
กถินสมุฏฺฐานํฯ
[390]
ทฺเว เสยฺยาหจฺจปาโท จ, ปิณฺฑญฺจ คณโภชนํ;
วิกาเล, สนฺนิธิญฺเจว, ทนฺตโปนมเจลกํฯ
[391]
อุยฺยุตฺตญฺจ วสุยฺโยธิํ, สุรา, โอเรน นฺหายนํ;
ทุพฺพณฺณกรณญฺเจว, ปาฏิเทสนิยทฺวยํฯ
[392]
ลสุณํ, อุปติฏฺเฐยฺย, นจฺจทสฺสนเมว จ;
นคฺคํ, อตฺถรณํ, มญฺเจ, อนฺโตรฏฺเฐ, ตถา พหิฯ
[393]
อนฺโตวสฺสมคารญฺจ, อาสนฺทิํ, สุตฺตกนฺตนํ;
เวยฺยาวจฺจํ, สหตฺถา จ, อาวาเส จ อภิกฺขุเกฯ
[394]
ฉตฺตํ, ยานญฺจ สงฺฆาณิํ, อลงฺการํ, คนฺธวาสิตํ;
ภิกฺขุนี, สิกฺขมานา จ, สามเณรี, คิหีนิยาฯ
[395]
ตถา สํกจฺจิกา จาติ, เตจตฺตาลีสิเม ปน;
สพฺเพ เอฬกโลเมน, ทฺวิสมุฏฺฐานิกา สมาฯ
เอฬกโลมสมุฏฺฐานํฯ
[396]
อญฺญตฺราสมฺมโต เจว, ตถา อตฺถงฺคเตน จ;
ติรจฺฉานวิชฺชา ทฺเว วุตฺตา, อโนกาสกตมฺปิ จฯ
[397]
สพฺเพ ฉ ปนิเม ธมฺมา, วาจโต วาจจิตฺตโต;
ทฺวิสมุฏฺฐานิกา โหนฺติ, ปทโสธมฺมตุลฺยตาฯ
ปทโสธมฺมสมุฏฺฐานํฯ
[398]
เอกํ นาวํ, ปณีตญฺจ, สํวิธานญฺจ สํหเร;
ธญฺญํ, นิมนฺติตา เจว, ปาฏิเทสนิยฏฺฐกํฯ
[399]
เอตา =03 จตุสมุฏฺฐานา, สิกฺขา จุทฺทส โหนฺติ หิ;
ปญฺญตฺตา พุทฺธเสฏฺเฐน, อทฺธาเนน สมา มตาฯ
อทฺธานสมุฏฺฐานํฯ
[400]
สุติํ, สูปาทิวิญฺญตฺติํ, อนฺธกาเร ตเถว จ;
ปฏิจฺฉนฺเน จ โอกาเส, พฺยูเห จาติ อิเม ฉปิฯ
[401]
สพฺเพ ตุ ทฺวิสมุฏฺฐานา, จตุตฺถจฺฉฏฺฐโต สิยุํ;
เถยฺยสตฺถสมุฏฺฐานา, เทสิตาทิจฺจพนฺธุนาฯ
เถยฺยสตฺถสมุฏฺฐานํฯ
[402]
ฉตฺต, ทณฺฑกรสฺสาปิ, สตฺถาวุธกรสฺสปิ;
ปาทุกูปาหนา, ยานํ, เสยฺยา, ปลฺลตฺถิกาย จฯ
[403]
เวฐิโตคุณฺฐิโต จาติ, เอกาทส นิทสฺสิตา;
สพฺเพ เอกสมุฏฺฐานา, ธมฺมเทสนสญฺญิตาฯ
ธมฺมเทสนสมุฏฺฐานํฯ
[404]
ภูตาโรจนกญฺเจว , โจริวุฏฺฐาปนมฺปิ จ;
อนนุญฺญาตมตฺตญฺหิ, อสมฺภินฺนมิทํ ตยํฯ
สมุฏฺฐานสีสกถา นิฏฺฐิตาฯ
เอกุตฺตรนยกถา
[405]
กติ อาปตฺติโย โหนฺติ, สมุฏฺฐาเนน อาทินา?
ปญฺจ อาปตฺติโย โหนฺติ, กุฏิํ สํยาจิกาย ตุฯ
[406]
กโรโต ปน ติสฺโสว, ปโยเค ทุกฺกฏาทโย;
วิกาเล ปน ปาจิตฺติ, ตถา อญฺญาติหตฺถโตฯ
[407]
คเหตฺวา ภุญฺชโต วุตฺตํ, ปาฏิเทสนิยมฺปิ จ;
ปญฺจิมาปตฺติโย โหนฺติ, สมุฏฺฐาเนน อาทินาฯ
[408]
กติ =04 อาปตฺติโย โหนฺติ, ทุติเยน ตุวํ ภณ?
อาปตฺติโย จตสฺโสว, โหนฺตีติ ปริทีปเยฯ
[409]
‘‘กุฏิํ มม กโรถา’’ติ, สมาทิสติ ภิกฺขุ เจ;
กโรนฺติ เจ กุฏิํ ตสฺส, วิปนฺนํ สพฺพถา ปนฯ
[410]
ติสฺโส ปุริมนิทฺทิฏฺฐา, ปโยเค ทุกฺกฏาทโย;
ปทโสธมฺมมูเลน, จตสฺโสว ภวนฺติมาฯ
[411]
ตติเยน กติ ชายนฺติ, สมุฏฺฐาเนน เม ภณ?
ตติเยน ตุวํ พฺรูมิ, ปญฺจธาปตฺติโย สิยุํฯ
[412]
ภิกฺขุ สํวิทหิตฺวาน;
กโรติ จ กุฏิํ สเจ;
ติสฺโส อาปตฺติโย โหนฺติ;
ปโยเค ทุกฺกฏาทโยฯ
[413]